Matam-is na Pagmamahal
May 7, 2009 Ang tawag sa kaniya ay “Ilaw ng Tahanan”, hindi dahil sa siya ang nagsisindi ng gasera sa pagsapit ng dilim. Hindi rin dahil sa siya ang gumigising sa kaniyang mga anak sa pagsikat ng araw sa umaga. Ito ay dahil siya ang nagbibigay ning-ning sa buhay ng bawat isa sa loob ng tahanan. Gising na si ina bago pa laang tumilaok ang aming tandang sa madaling-araw. Hangos na sa pagsisindi ng kalan upang magluto ng agahan. Bago magtanghali, nalininis na ang mga ulbo at napakain na rin ang patabaing baboy at ang dalawang bulaw. Nagamasan na rin ang taniman ng gulay at nakapagdilig na rin. Sa pagsapit ng takip-silim handa na rin ang hapunan. Nakasalansan na rin ang mga panggatong na mga urang sa kalan. Walang kapaguran ang pangaraw-araw na gawaing-bahay ng isang ina. Hindi ko na naisulat pa ang iba. Ginagawa niya ang lahat ng mga ito hindi upang magmapuri or magmalaki. Ginagampanan niya ang pagiging ina dahil sa matam-is na pagmamahal niya sa kaniyang mag-anak. Sa iyo ina at sa lahat ng mga ina, isang maligayang pagbati sa inyo sa “Araw ng mga Ina” (Mothers’ Day) sa ika-10 ng Mayo taong 2009.
